سلوى بوقعيقيص اتصلت بقناة النبأ في يونيو ألفين وأربعطاش وقالت أن القوات المهاجمة لبنغازي "القادمة من الرجمة قوات حفتر" تقصف بشكل عشوائي وعنيف.. خلال نصف ساعة فقط من المكالمة كانت مقتولة. من حضر واقعة القتل؟ الغفير المصري متاع حوش سلوى بوقعيقيص. شن صار له الغفير؟ جاه ضابط التحقيق "ناصر بن زبلح" وحقق معاه

 رفعوه لمركز شرطة الفويهات "الفويهات ومركزها يتبعوا للكرامة طول الحرب زي بوهذيمة"... وبعدين صفوا الغفير في المركز.. وثاني يوم بالضبط من قتل الغفير، اغتالوا ناصر بن زبلح نفسه..

ولهذا يا غزال ما فيش أي كرامنجي حاليا يتجرأ يطالب بفتح أي تحقيق في اغتيال ناصر بن زبلح ولا تحقيق في اغتيال الغفير المصري داخل مركز شرطة الفويهات نفسه لأنهم عارفين من اللي قتل سلوى وراجلها والغفير بعدهم

طبعا ما نبيش نفتح باقي اغتيالات بنغازي زي اغتيال مدير مديرية أمن بنغازي العقيد فرج الدرسي المعروف باسم فرج الديسكو ، أو آمر البحرية العقيد صالح الحضيري لما وقف محاولة قرصنة الفيدراليين للنفط لمالطا وروح لبنغازي فجروله سيارته ومعاه ولده فراس طفل الله يرحمهم، وإلا تفجير الثانوية الفنية في مارس ألفين وأربعة عشر اللي داره الوكواك وقتل فيه شباب كتيبة شهداء ليبيا الحرة وبسببه اقعيم حبس الوكواك وتدخل حفتر والعواقير وطلقوا الوكواك ، ما نبيش نتكلم على الثلاثين جثة اللي ينخطفوا من بنغازي والمرج وينقتلوا وينعزقوا وراء الجامع الحمر في المرج زي طارق الدرسي ومفتاح بوالنافرة وأنس خطاب وغيرهم الله يرحمهم،، ما نبوش نتكلموا على مجزرة الأبيار الي انقتلوا فيها شيابين زي الشيخ الورفلي اللي انخطف من البريقة ومعاقين زي عماد بوخرو العقوري الله يرحمهم وغيرهم وغيرهم

ابريك اللواطي قال أن القيادة العامة تعطي في العواقير في وزارة الموت بس ومش حاسبتهم في وزارات... سيارته تفجرت نفس الأسبوع..

محمد أبوقعيقيص دار مجموعة ليبيا إلى السلام وجي لتونس تلاقى مع حكومة السراج، روح لبنغازي سيارته تفجرت نفس الأسبوع...

سهام سرقيوة..

ما زال عند الحفاترة دم يتكلموا بعد حنان البرعصي..

فرج اقعيم.

محمد الحجازي..

و و و و و و

في نهاية الألفين وثلثطاش واحد من مهندسي السجل المدني في بنغازي طلع تكلم على حصول مصريين على جوازات وكتيبات عائلة بأرقام كبيرة، ووقتها كان عزالدين الوكواك يدخل في المصريين من مطار بنينا بدون حتى أختام.. شن صار للمهندس؟ اغتالوه ثاني يوم وفي نفس اليوم الوكواك يبي يغطي على الاغتيال دار فيلم هندي على أساس أنه شد قطريين في بنغازي، وجاب سوادين لهجتهم سوادين وعرضهم فيديو سريع للتغطية على اغتيال المهندس..

في الألفين واربعطاش قناة ليبيا أولا وبعدها قناة وطن الكرامة جابوا أربعة قصص مختلفة متناقضة تماما لأربعة أشخاص يقولوا أنهم قتلوا العقيد فرج الدرسي.. طلع أحمد ولد العقيد فرج وطلعت زينب زوجة فرج الثانية كذبوا الروايات المتناقضة كلها.. شن صار بعدها؟ أحمد مات وزينب جتها رصاصة قدام باب حوشها بالضبط...

في بداية أبريل ألفين وأربعطاش الضابط عبدالحميد الإمام من قاعدة بنينا تكلم ضد حفتر.. ثالث يوم صفوه وقريب راحت بنته هاجر معاه..

كم بنذكروا اسم كم.. شارع الزيت والجامع الحمر في المرج وطريق الأبيار ومشروع الصفصفة اللي صفيتوا فيه بوسيف ولد عضو المؤتمر سليمان زوبي لما تكلم ضد حفتر..

(المقالات المنشورة لا تعبر بالضرورة عن رأي الموقع بل عن رأي كتّابها)