ما هي خطط بلدية تاجوراء للاستفادة من الإمكانيات الهائلة التي تزخر بها المنطقة؟ وما المشاكل والصعوبات التي تواجه هذه الخطط؟

ما انعكاسات ملتقى رجال الأعمال الذي عُقِد مؤخرًا في تاجوراء على البلدية؟ وهل من تعاون مع رجال الأعمال الأتراك؟

وما نصيب تاجوراء من مشاريع عودة الحياة؟ وماذا ينقصها لتكون بلدية رائدة؟

كل هذا وذاك يُجيب عليه وكيل ديوان بلدية تاجوراء "أيمن الكاتب" في هذه المقابلة...

تحظى مدينة تاجوراء بإمكانيات اقتصادية وزراعية وسياحية وجغرافية كبيرة تمكنها من إقامة مشاريع استثمارية ناجحة في مختلف المجالات، ماهي خطط البلدية للاستفادة من هذه الإمكانيات بما يسهم في تطوير وتنمية المنطقة؟

تاجوراء من أكبر البلديات في مدينة طرابلس الكبرى هي فعلا فيها موارد كبيرة جدا، الإشكالية الكبيرة في بلدية تاجوراء هي طبعا التخطيط المعدوم في العقود السابقة وكخطة البلدية المفروض تكون نازلة في المستهدفات امتع 22 و23 و24 إن شاء الله من ناحية البنية التحتية أو الطرق أو السكن، والمشاكل طبعا عديدة جدا.

ما هي المشاكل والصعوبات التي تواجهها بلدية تاجوراء في تنفيذ خطتها لتنمية المناطق وتطوير البنية التحتية بالبلدية؟

المشاكل بالنسبة لبلدية تاجوراء وباقي البلديات في ليبيا كلها تعتبر المشكلة الأساسية الناحية السياسية والناحية الأمنية، إلي هما ماخلوش استقرار للوزارات أو (((للأجهزة الوزارات للشغل،))) والتسليم غير السلس بين الوزارة السابقة والوزارة الجديدة، طبعا أثر هذا على المستثمر الأجنبي والمستثمر الليبي للاستثمار في البلديات.

احنا مثلا كان عندنا مخطط السويسري في بداية السبعينات في تاجوراء وبعدين جي وداروا المخطط الثاني وهو المخطط الألماني والماليزي لتاجوراء، وللأسف الشديد العشر سنوات هذه والي قبلها لا نفذوا المخطط السويسري ولا المخطط الألماني وقاعدة العشوائيات موجودة.

وأكبر المشاكل هو التخطيط والي هو قاعدة بلدية تاجوراء تقريبا 8% منها يعتبر مخطط ونازل في التخطيط والمخطط العام، (((والي هو دائما الدولة تبي تعدل ولاتبي تعالج المشاكل )))إلي بتحدث من المقسمات العشوائية أو البناء العشوائي إلي صاير ولا الاستثمار العشوائي أصلا في البلدية.

ماهي المشاريع المتوقفة بالبلدية وما نسبة الإنجاز فيها؟ ولماذا لم يتم استئناف العمل بها؟

المشاريع هلبا طبعا في مشاريع استراتيجية تهم تاجوراء وخاطي تاجوراء نقولوا مثلا محطة التحلية لو اشتغلت هتغذي جزء كبير من طرابلس الكبرى، وعندنا محطة امتع الكهرباء محطة شرق طرابلس إلي هي هتغدي تاجوراء وطرابلس بالكهرباء وبالمياه قاعدة فيها مشاكل تبي الحل.

وعندنا مشروع 10 آلاف وحدة سكنية إلي هو توقف في بداية الثورة ولم يتم الاستئناف فيه والشركة امتعها قاعدة ماتبيش تجي.

وعندنا مشروع ميناء المرينا إلي هو ميناء الحميدية ماشيين فيه نسبة إنجاز ممكن 30% تقريبا وقاعد حتى هو متوقف للأسف الشديد.

عندنا مشروع (((( الم... كلمة مش واضحة))) وسوق الحوت حتى هو قاعد متوقف مع إمكانية إكمال المشاريع هذه.

عندنا مشروع توصيل مياه النهر الصناعي حتى هو عندنا الحوض موجود من بداية الألفينات لكن الحمدلله حتى اللحظة هذه ماتمش التوصيل.

عندنا مشاريع ثانية إلي هي امتاعت المراكز الإدارية كثيرة في تاجوراء قاعدة ماكملتش المباني هذه.

عندنا محطات الرفع هذه نقولوا إنها من مشكلة البيفي ومشكلة عرادة ومن مشكلة تاجوراء نفسها هي المشاكل امتع تصريف مياه الأمطار، وهي  منطقة مافيهاش أماكن لتصريف المياه امتع الآبار السوداء فكل حوش عامل بير سودة والناس هذوا وصلوا لأنابيب تصريف مياه الأمطار، فتو حاليا مافيش محطة تنقية ولا محطات رفع وقاعدة كلها هكي تخش لمية البحر وتسبب في تلوث وهي معظم مياه طرابلس تع البحر خاشلها التلوث.

تزخر تاجوراء بالكثير من الموارد السياحية، أشهرها شاطئ البحر و الغابات " البوسكوات " وهي أماكن جيدة لقضاء الإجازات والتنزه هل لدى بلدية تاجوراء أي خطط للاستفادة من هذه الموارد وإقامة المشاريع الاستثمارية مثل المنتجعات والفنادق لجذب السائح المحلي والأجنبي؟

 كمخططات ... شركات استثمار ليبية عامة وماهياش حتى خاصة لكن للأسف الشديد نرجعوا لقصة المستثمر أو نرجعوا لقصة الروتين الإداري الطويل إلي هو مايخليش الجهات تكمل المشاريع هذه.

بالإضافة طبعا للمشاكل الثانية إلي هي بين أملاك الدولة والمشاريع والأجهزة هذه أو نقولوا الشركات العامة، أو نقولوا في أماكن بعض العائلات عندهم الحجج ويدعوا الملكية وقاعد في إشكاليات في الكلام هذا.

طبعا يعتبر الشط تع تاجوراء ماهوش كله صالح للسباحة أو إلي هو نقولوا شط القزة هذايا لكن ممكن نقولوا يمكن أن يستثمر حتى لو كورنيش زي ما انقولوا مثلا، وفي مقترحات للشي هذه لكن هذا يبي استقرار لو في شركات وطنية تبي تنفذ أو شركات أجنبية فالموضوع يتعلق بالاستقرار السياسي لتخصيص الميزانيات للأشياء هذه ويتعلق بالاستقرار السياسي والأمني لو في مستثمر أجنبي يبي يجي.

بالنسبة للفنادق في مشروعين تع فنادق والي يعتبر خلاص، وفي إلي واصل نسبة الإنجاز فيهم 70%، والثاني تقريبا 60% أو أقل شوية، لكن للأسف الشديد الملاك معش يبوا يصرفوا أو يبوا ترسى الحكاية على شي أو يبوا من يستثمر معاهم.

طبعا عندنا فندق 17فبراير وهذا قديم وهو وقت مايصير حروب يخصص للنازحين من هذه الحروب، وطبعا في تقصير وفي إهمال من العائلات إلي تسكن فيه ومن أبنائهم، وطبعا كل مرة يسكنوا فيه تدمر الأشياء إلي فيه فيبي صيانية كبيرة. بالإضافة إنه هو يبي طريق إلي هو احنا ساعيين فيها بقوة إنه تندار هذه الطريق وتنخدم للفندق هذا وتحل المختنق امتع سيرتي إلي يعرفوه طبعا جماعة تاجوراء.

احتضنت بلدية تاجوراء الشهر الماضي ملتقى رجال الأعمال والصناعيين الليبي- التركي بحضور رئيس الحكومة عبدالحميد الدبيبة.. ماهي أهم النتائج التي خلص إليها هذا الملتقى؟ وهل تم الوصول إلى اتفاقات أو تفاهمات بشأن إقامة مشاريع استثمارية بين الجانبين؟

طبعا الزيارة هذه يعتبر ساهمنا نحن فيها من البداية وطالبنا إنه يكون لينا نحن السبق من أي فرع من أي اتحاد رجال أعمال في العالم، فكان التواصل هذا مع اتحاد رجال الأعمال التركي، والحمد لله فتحوا فرع هنا في طرابلس في سيدي المصري والتواصل كان ليه فترة فخصوا تاجوراء بالزيارة، والتجار عادة يجوا لأي مكان فيه معارض واحنا عندنا هنا معرض طرابلس الدولي  فيصير في تنافس بين الشركات إلي تجي في المعارض هذه.

لكن بالنسبة للوفد التركي هذا يعتبروا اتحاد رجال أعمال يعني التاجر هذا ماهوش منافس للتاجر الثاني بل هو مكمل ليه شركة يعني، فالوفد إلي جانا هذا يعتبر أكبر وفد جانا، جو حوالي 50 رجل أعمال تركي برئاسة رئيس الاتحاد نفسه إلي هو محمود اصملي، وطبعا في سنة 79 تقريبا جاء  رئيس الوزراء نجم الدين اربكان الله يرحمه وكان معاه 203 رجل أعمال، لكن نفس الشي كان في مشاكل في تركيا نفسها وتمت الإطاحة بيه، لكن الشركات مازالت موجودة في ليبيا التركية بالنسبة للاتحاد هذا موجودين في ليبيا وبدو في النشاطات امتعهم زي شركات التشييد والإنشاءات  وجابوا حتى المعدات امتعهم.

والخط البحري يعتبروا هم فاتحينه بين ليبيا مصراتة - أزمير، والأسبوع الماضي الحمد لله فتحو الخط لطبرق وساعيين مع باقي اتحادات الغرف يفتحوا لطرابلس إن شاء الله والخمس بإذن الله. 

أطلقت حكومة الوحدة الوطنية خطة "عودة الحياة" والتي تشمل إقامة مرافق صحية ومدارس وتوسعة الطرق وإقامة المنتزهات والحدائق وغيرها من المشاريع وخصصت لها المليارات.. ما نصيب بلدية تاجوراء من هذه المشاريع وهل تم إنجاز مشاريع ضمن هذه الخطة؟

بلدية تاجوراء ماكنتش محطوطة في 22 هذا السبب الأساسي، والسبب الثاني إنه في سنة 2022 الحكومة الموجودة ماخصصت لها الميزانية بش تستكمل خطة عودة الحياة 2، وزي مانعرف حتى منح الزواج توقفت للشي ذاته وهو عدم اعتماد الميزانية للسنة الجديدة.

وبالنسبة للسيد محمد إسماعيل في شي إن شاء الله إلي هو بالنسبة الاتفاقيات إلي صارت والأعمال إلي قام بيها لحد الآن الكبيرة، خليني من العمل اليومي الروتيني، قام بصيانة أو استحداث 3 جزر وهي جزيرة إسبان وجزيرة 25 وجزيرة إلي هي امتع طريق العمارنة وجزيرة بوشوشة، وإن شاء الله في خدمة كبيرة مع السيد محمد إسماعيل.

هل هناك حلول بما يتعلق بالإشارة الضوئية البيفي والمختنقات الموجودة داخل وخارج بلدية تاجوراء التي تتسبب في مشاكل سواء لأهالي تاجوراء والساكنين خارجها؟

الحلول هي قديمة موجودة مافي حاجة جديدة لأنه هذا بالنسبة للبيفي التقاطع المخطط امتاعه قديم وكان في دراسات ميدانية لعمل الكوبري أو الجسر إلي هو موجود في المخطط، لكن للأسف الشديد الشركات المحلية معندهاش القدرة إنها تنفذ لحد اللحظة هذه.

وبالنسبة للشركات الأجنبية في تنافس شديد بين الشركات التركية والشركات التونسية والشركات المصرية، وهذا من اختصاص جهاز الإسكان والمرافق وهم ساعيين في استجلاب العروض للمشروع هذا.

بالنسبة للكوبري عندنا المدخل الشرقي لطرابلس  البيفي وعندنا الجسر الثاني تع مستشفى القلب  والمفروض ينداروا هم الاثنين لتخفيف الازدحام، ومنها ازدحام سيمافروا مستشفى القلب.

وفي مشروع ثاني كبير إلي هو باديين فيه كدولة ليبية وهو مشروع الساحلي باديين فيه في كعام وماشيين فيه، في تعاقدات كبيرة بين جهاز الإسكان والمرافق أو الطرق والجسور، مش متأكد بالضبط، مع شركات محلية للصيانة والترميم، وفي مناطق حتى فيها توسعة للطريق الساحلي.

بالإضافة إلي انقول أزمة المختنقات هذه عندنا طريق عودة الحياة واحد هو طريق عين زارة هذا واحد من الطرق لو يكمل وهما ماشيين فيه تو هيخفف من زحمة البيفي، لأن في إلي قادمين من شرق طرابلس ابدا من القرابولي والمنطقة الجنوبية والشرقية في إلي يبدا يمشي من الطريق الدائري وادي الربيع ويخش بعدين لوسط طرابلس من الطريق هذيك إلي هو يخفف على البيفي مثلا، ولو صار من الطريق الثانية واستلموا الشركات المواقع، والي نسموا فيها طريق الميناء جماعة تاجوراء هنايا، هذه هتكون مكملة لكوبري القلب هنايا وهذا هيخفف كثير على سيمافرو القلب أو المزدوجة أو البيفي أو الضواحي لأنه إلي بيجي ويمر على طريق الشط يطلع طول من دون مايمر على الازدحامات هذه.

بالإضافة إنه في دراسات طالبينها من جهاز المواصلات بارك الله فيهم، إنه يكون حتى طريق امتع تاجوراء إلي هو من البيفي للطريق الدائري يكون حتى هو مزدوج وهذا هيخفف الازدحامات هذه.

مع طبعا في دراسات جديدة اقترحوها بعض المهندسين للكوبري، طبعا هو كوبري كبير وفيه نفق مشرق ومغرب وبعدين في جزيرة دوران وبعدين في كوبري شمال جنوب فوق الجزيرة هذه، فاحتمال يصير فيه تحوير ويتصغر شوية لأنه المبلغ كبير يمكن يندار دراسة يكون مشرق ومغرب فقط ويكون جسر حديدي كمرحلة سريعة.

بما أنكم مجلس بلدي جديد على البلدية مالذي يمكن أن تقدموه لبلدية تاجوراء لتكون بلدية رائدة من بين البلديات؟

النواقص كثيرة هلبا والتحديات كبيرة لكن إللي نشتغلوا عليه طبعا هو العنصر البشري إلي هو أهم حاجة هذه، وساعيين لتنظيم دورات في عدة أماكن للشباب والموظفين لتأهيلهم للقيام بالأعمال المناطة بيهم. بالإضافة إلى أن الهيكل التنظيمي تغير غيره وزير الحكم المحلي الحالي السيد بدر وزاد فيها حاجات ماكانتش موجودة في الهيكل التنظيمي الأول، مثلا نقولوا حاضنات الأعمال والي هي اطور من أي مكان موجودة فيه مثلا البلدية أو قسم أو جسم أو إدارة مثلا نقولوا إدارة الإيرادات المحلية أو حاضنات الأعمال أو تمكين المرأة. طبعا هذه كلها بتخلق مجالات جديدة للعمل، وطبعا هذه كلها حاجات جديدة لأنه في بلديات عندها خبرة في الشي وعندها ناس تخدم فيها وفي بلديات ماعندهاش، وطبعا الوزارة بارك الله فيها عندها دورات للموظفين في الحاجات الجديدة هذه.

هل هناك تعاون قريب بين اتحاد رجال الأعمال الأتراك والبلدية ؟

بالنسبة لاتحاد رجال الأعمال الأتراك لحد اللحظة قاعدين ينظموا في بيتهم الداخلي هنايا في ليبيا يعني، وبالنسبة لينا احنا البلديات مش تاجوراء بس عندنا مشكلة مع اللوائح تع القوانين الليبية إلي هي أصلا قاعدة قوانين اشتراكية ومرة مرة يجي وزير ويستصدر قوانين جديدة.

وطبعا قصة الانقسام وحكومة الجديدة وحكومة قديمة والمستثمر مايبي يجازف بالفلوس امتاعه إلا لو بيجي ويبدا ضامن إنه الفلوس امتاعه مضمونات من الدولة الليبية وهذا طبعا مش موجود لأنه زي ماقلنا الميزانية مزال مانزلتش.

عندنا مشكلة التنمية طبعا مخططات إلي هي مش موجودة مثلا مخططات تسع لنهر صناعي أو صرف صحي ماتلقاش، كل يوم تمشي لجهاز أو تمشي لشخص أو لواحد من الشيابين القدم ماتوصلش لمعلومة. مثلا نقول الطريق الجديدة هذه المشهورة بدوا فيها في 78 إلى الآن مش عارفين المية امتعها كيف صاير فيها، وقاعديين ساعيين ومانبو نديروا الطريقة البدائية إلي هي تحفر وخلاص، مع وجود الشركات هذه إلي هي عندها تشبح تحت الأرض والجس لكن هذا يبي فلوس وهو مش موجود تو.

ساعيين بالنسبة للكادر الوظيفي تع البلدية أو بالنسبة للمواطنين الموجودين في البلدية، إن شاء الله مجهزين حزمة من الدورات التدريبية تخص الموظفين أو تع التعليم أساسا، ومستهدفين حتى الباحثين عن العمل أو ربات البيوت بدورات كبيرة.

تاجوراء تعتبر من البلديات الغنية بمراكز البحوث  ونحن للأسف مش مستغلين الشي هذايا لأن المراكز حالها زي حال الشركات الصناعية من التخبط الإداري أو من قلة الميزانيات، لكن الحمدلله بالنسبة لمراكز البحوث العقول موجودة وفي تنسيق إنه كيف ننهضوا بيهم بإذن الله تعالى إن شاء الله.